ශ්‍රී ලංකාවේ සෑම ප්‍රදේශයකම වෙසෙන ඉගෙනීමට දක්ෂ, නමුත් ආර්ථික අපහසුතා පවතින දරු දැරියන් හඳුනාගෙන ඔවුන්ගේ ඉදිරි අනාගතය යහපත් කිරීමේ ඒකායන අරමුණ පෙරදැරි කරගෙන ගරු ජනාධිපතිතුමාගේ උපදෙස් හා ජනාධිපති ලේකම්තුමාගේ මඟපෙන්වීම අනුව ජනාධිපති අරමුදලේ කාර්ය මණ්ඩලය ඉහත ශිෂ්‍යත්ව ලබා දීමේ වැඩසටහන ක්‍රියාත්මක කරන ලදි. ඒ අනුව අදාළ දරු දැරියන්ගේ ඉගෙනීමේ කටයුතු, ආර්ථික අපහසුතා හේතුවෙන් අතරමග නතර නොකොට උසස් අධ්‍යාපන වරම් හිමිකරදීම දක්වා කාලය තුළ ඔවුන්ගේ දිවියට යම්තාක් දුරකට හෝ සහනයක් සලසා ඔවුන්ගේ ඉදිරි ජීවිතය යහපත් කිරීමට අත්වැලක් සැපයීමට මෙම ශිෂ්‍යත්ව වැඩසටහන උපයෝගී වේ.
එබැවින් ඊට සමගාමීව, ජනාධිපති අරමුදලේ 2021/2022 වසරට අදාළව ශිෂ්‍යත්ව ප්‍රදානය කිරීමේ වැඩසටහනේ ශිෂ්‍යත්වලාභීන්ට ජනාධිපති අරමුදල වෙතින් මේ වන විට මාසිකව රු. 5000.00 ක දීමනාවක් ගෙවනු ලබන අතර මෙ‍තෙක් මාසික වාරික 10ක් ගෙවා ඇත. කෙසේවුවද, අදාළ දරු දැරියන්ගේ විශේෂ ඉල්ලීම් මත 2024 පෙබරවාරි මස සිට අදාළ දීමනා මුදල වැඩි කර ලබා දීමට ගරු ජනාධිපතිතුමාගේ අනුමැතිය ලැබී ඇත.
ඒ අනුව 2024 පෙබරවාරි මස සිට අ.පො.ස. උසස් පෙළ විභාගය‍ට පෙනී සිටින තෙක් අදාළ ශිෂ්‍යත්වලාභීන් වෙත රු. 6000.00 ක මාසික දීමනාවක් සෑම මසකම පළමු සතිය තුළ ජනාධිපති අරමුදල වෙතින් ලබා දෙනු ලබන බව ඉතා සතුටින් දැනුම් දෙමි.
